Jyden han æ stærk å sej

1
Æ æ bøjn te fest ædau

Men så tænt æ olt ælau

Wa mon de’ no olt ska ske

De’ ka jen got blyw betænkle we

2

Wa mon æ no ska tej å

Wa ha ol’ de anne å

Hae de slips – å jak’ moske

De’ ka jen got blyw betænkle we

3

Do will et væ olt fo fin

It go hen å blyw te grin

Mi’t æ mell – wa hø sæ te

De’ æ æ grow betænkle we

4

Wem mon æ ska ha te boes

Æ et jen som æ ka roes

Sån’en fremmet pich, ja de’

Well æ we’ nau’ betænkle we

5

Sånt naue fornem ma mo æ

Da vist helle næcht å taj

Naj, en bøf – katøfle te

Well æ væ knap så betænkle we

6

Ka æ toel de ma vi foe

Æ æ wiin de richte o’e

Må æ rych ? Hø de sæ te ?

De’ æ æ werkle betænkle we

7

Å æ gjaw, wå den få dye

De’ vil jo de anne støe

Men wa skie, en smuel entré

De’ ska jen et we betænkle we

8

Æ hæ gien en årnle ting

Et såen naue tingeling

Naue de æ le’t nøtle we

De’ æ æ et så betænkle we

9

Æ æ kommen got i klem’

Æ sku nok we bløwen jem’

We mæ sjel – men et få de’

De’ æ æ osse betænkle we

10

Fo’ æ fest hæ æ fotjen’

Æ ska nok bego mæ pæn’

Mæn di anne folk – ja se’

Dæm æ æ møj betænkle we